Dalam Pemandang 21:8 madah;
"Tang sida ti penakut, ti aum juak, ti jai, ti pemunuh, ti bambai, ti ngaga kereja engkeramat, ti nyembah engkeramba, enggau semua ti bula-endur alai sida nya danau ti angus laban api merirang, iyanya pemati ti kedua."
Macha Pemandang nang semampai ngasuh ku geli laban naka pemalat ukum ti diengkah ke Iya ngagai urang ti bedusa. Tu mega meh nyadi ngagai urang ti suah bekena ke manang laban sida iya tu aum juak/ati dua. Ditunu ba dalam api ti 7 kali angat ari api ba dunya tu. Aku berasai sinu laban agi mayuh urang (sekeda iya urang Kristian empu) ke agi ka ngena manang tu. Nadai penguntung ngena manang tu. Enti kitai ke udah bisi Tuhan tu. Kapa begiga ke manang agi? Semua "package" bi ba Iya magang. Nadai guna begiga ke manang agi. Munyi ko Raja David dalam Masmur 23:1 " Tuhan ti pengibun aku; Aku bisi semua utai ti dipegunaka aku." Enti Tuhan bisi enggau kitai, kitai enda sekali-kali kurang utai ti dikena. Enti kitai minta ba manang, minta tulung antu; anang ka meri, pemisi kitai abis dichuri "utai nya". Abis duit kena meli telu, bebunuhka babi, manuk abis disayat. Nyau kitai ke majak seranta. Kenyang bala antu, bala manang. Kitai nyu belauk ka budu. Nama asil? Tang enti kitai minta ba Tuhan, nama utai ti dipinta iya deka diberi iya magang. Alu bisi ga urang nanya, "Nama kebuah aku suah mat minta tang Iya nda kala meri?" Munyi ko Jesus, "Kini ke pengarap kita?". Kitai nama udah minta utai siti ari Tuhan anang kakang ati. Anang alu nanya dalam ati, " Kada ke ninga Tuhan peminta ku tadi?" Kini ke iman kita!!?. enti nuan lebuh dinterbiu ka ngulih ka pengawa, chuntoya nyadi chigu. Enti nuan nadai kunpidin/confidence dalam diri, ka urang milih nuan? Amat meh nuan ka amat nyadi chigu, tang maya urang ngasuh nuan ngaga tu ngaga nya alu meh nuan kakang ati. Ka urang milih nuan? No way ko ribai. Bakanya meh Tuhan, enti nuan nadai determination/ pengeliat ati ka minta, nadai jaku nya! Nyu jauh tepejuh ari tupik tu tang tu ukai nama ngambika kitai mina bepanggai ba Iya aja dalam serap pengawa kitai. Munyi ko aku tadi tu, bekenaka manang tu nadai meri pemanah ngagai pengidup kitai. Nama utai ulih diberi sida iya?Tang bisi ga urang nanya lagi, " Kati ke aku tu berubat ba manang tau gerai? Ha! Tanya ti manah. Amat bisi ga sekeda manang ti amat bisa, bepengaruh. Ulih ngubat urang, ngeraika urang. Tang siti kita mesti ingat. Sitan pan ulih ngaga pengajih. Dalam 2 Korint 11:14 " Patut nya baka nya! Sitan pan ulih ngaga diri bala melikat penampak!" Semua utai nya bisi rega magang. Ba Sitan enti ka minta utai mesti bisi utai kena nganti. Enti ba adat kitai bala sida manuk babi nya meh nyadi "mangsa". Nyadi genselan. sekali nuan dah bekenaka manang, nya baka nuan udah ngaga sempekat nggau Sitan nya! Alu bisi tali nanchang nuan. Nuan kena sumpah! Setat ari nya meh nuan alu nyadi ulun Sitan. Baka chapi ke dituchuk ba idung. Alu nadai sitipan ulih ngelepas nuan ari tanchang nya. Tang sukur amat amat ngagai Apai laban Iya udah ngutus Anak Iya empu, Jesus Kristus ke dunia, mati ke kitai alu nganchurka kuasa pemetang enggau tanchang Sitan. enti ukai ketegal Iya mega aku engka nda idup datai ke diatu.
Aku bisi siti testimuni bakani Tuhan ngelindung aku lebuh ku nda sengaja ngachau pengawa "manang" tu. Aku nemu cherita tu engka nda masuk akal sekeda tang nya meh testimuni aku laban aku empu ke ngasai iya. Cherita tu bakatu. Utai tu nyadi taun nyin kemari, urung tengan taun 2008. Maya nya aku bisi enggau urang Public Speaking Competition. Chigu ke ngelatih ku iyanya Chigu Audrena.Maya nya mega aku enggau urang Sketsa Kerjaya baruh Chigu Ja'arah. Malam nya ba sekula aku dah janji belatih nggau Chigu ba bilik guru. Sebedau nya aku belatih Sketsa ba dewan makan. Malam nya seraya ke nganti Chigu Audrena datai, aku belatih sketsa dulu. Udah nya baru ku katas ngagai bilik guru. Lebuh dalam pejalai ngagai bilik guru dia aku tepedaka "bubul mirah" (fireball) siti ke baka tai bintang ba atas langit. Mirah terang alu bisi iku baka iku komet utai nya. Rara ku. Ko aku " "Tuhan, nama utai nya?" Sekali tak alu padam meh api mirah nya alu baka ke pechah. Aku alit ati meda nya tang mayanya aku enda entu kisuk ndar nggau utai nya. Terus meh aku bejalai agai bilik guru, belatih. Tang malam nya aku tinduk....... Udah jenak-jenak tinduk, sekali, tiba-tiba mata ku enchelak alu meda aki tuai siku ba mua ku dia. Gamal iya ringat amat meda aku. Alu angkat iya jari iya ka nyekak aku. Nyu ka datai ba rekung ku, puji Tuhan aku alu enchelak amat. Nyelai.... Aku enchelak 2 kali. Bakani utai tu tau nyadi, aku pan nda nemu. Ndai gi aki tuai nya ba tisi ku dia. Aku nama agi alu bebungkur alu terus besampi. Puji Tuhan, Nadai utai ngachau ku nyentukka pagi. Ari siti aku berandau enggau kaban ku, dia sida madah ke utai peda ku nya malam nya "pulung". Utai ke dianjung manang kena bejai ke urang bukai. Laban aku ngerara nya tadi, asaiku ringat meh "manang" tu tadi alu ka datai nyekak aku.Ba dia mega aku sedar mensia bisi "mata rohani". Mata ti ulih meda utai ke nda ulih dipeda mata kasar kitai tu. Tu meh realiti pengidup . Bisi aja urang nggai meda pangan diri. Kati uji ku nda ngelala Tuhan mayanya nang dah "gul" aku mayanya. Nya meh besukur ndar ngaga Tuhan laban udah nulung aku. aku ngarapka kita semua ke agi bekenaka manang. Anang agi! Nadai penguntung kitai ngena manang. Tuhan ti patut digiga kitai. Tu meh naka iya dulu. Tuhan merekatka semua. Mupuk aku...
No comments:
Post a Comment