Kem Muda Mudi(Youth Camp) ba SIB Grace, Sibu

Lebuh 15 Mac 2009 ngagai 18 Mac 2009 arinya, SIB Grace Sibu bisi ngaga siti kem kena muda-mudi tauka Youth Camp. Lebuh mayanya bisi lebih kurang 60 iku youth sebelah Sibu datai. Bisi ke datai ari Sibujaya, Kemuyang lalu bisi mega ari Kanowit. Tajapan bisi sekeda kami datai ari denominasi gerija ti bebida tang kami sama menyadi dalam Kristus. Tema kem tu iyanya diambi ari 2 Peter 3:18 " Growing in the grace and the knowledge of Jesus Christ". Pastor iya iyanya ari Kuching iyanya Pastor Graman. Nyadi siti agi ayat patut diapal kami mayanya diambi ari John 14:6 "Aku meh jalai kena ngelala idup, nadai siku ulih datai ngagai Apai enti enda ulih Aku". Maya kem nya kami dibagi ngagai 10 kempulan. Aku ba kempulan 2. Kebuah pia laban kami bisi pekit antara kempulan alu pemenang deka diberi perais ba ari kepenudi.

Ajar Pastor Graman

Ati aku tetegu bendar lebuh Pastor Graman mai jaku Tuhan ke bekaul enggau penemu. Iya ngambi ari Masmur 119:133 "Ajar nuan meri penampak; meri penemu ngagai urang ke nda nemu utai". Ba dia ku nemu semina urang ke bepenemu aja ulih mujur. Alu Jaku Tuhan nya meri penemu. Ko iya " Enti kitai meda kitai bakanya, bakanya meh kitai. Enti kitai meda kitai nya nyadi Lutur, Lutur meh kitai ila. Enti kitai meda kitai nya nyadi Penchuri, Penchuri meh kitai ila." Reti iya dia nadai siku ulih nagang kitai ka nyadi nama utai dikedekaka kitai. Ari nya aku nemu Jaku Tuhan tu penting ba dalam pengidup kitai. Iya mega madahka pengawa sitan ba dunya tu semina ngerusak, munuh enggau enchuri tang Tuhan Jesus datai mai pengidup ti meruan.

Revival Night

Tu meh antara achara ti pemadu dikerinduka aku. Sapa ke ka nerima Tuhan Jesus Kristus nyadika Penglepas sida ngangkat jari. Lebuh Pastor Graman madah ke nya, nyu ka semua kami ngangkat jari. Udah nya Pstr Graman mai bala ketuai besampi ke kami. Lebuh maya nya urapan tauka anointing Roh Kudus labuh ngagai bala kami dia. Bisi sekeda nyabak, sekeda luput laban kuasa Roh Kudus. Mayuh sida ke dia meri kesaksian tauka testimuni madahka nda kala ngasai ke utai bakanya. Bisi siku madah ke iya nadai berasai iya alu luput alu iya berasai mua iya angat. Sedeka madahka diri alu nyabak enda nemu kebuah. Ba aku, Nya meh kuasa Tuhan Kitai. Iya ti sayau ka kitai. Aku besyukur laban pemanah Iya, aku agi begulai nggau Iya. Aku gerenti idup sida enda ka sebaka agi udah kem tu. Mayuh bala sida iya ditanya aku madahka diatu sida bisi pengerindu ka ngelala Iya agi. Puji Tuhan! Tu meh setat revival nyadi ba Sibu. Negu youth din. Aku pechaya enggau sepenuh atiku revival deka ngelawa bansa kitai. Tu meh maya iya....

Terima Kasih

Enggau tu mega aku ka meri terima kasih ke sukung kita. Bala gerija ari JB ti udah ngenjukka duit kena kem tu tadi. Enti ukai tegal pengenjuk sida kem tu enda tentu ulih digaga laban iya makai ungkus ti besai. Ngagai Pastor Magarate ti udah nganjurka kem tu. Pastor Geraman ti udah nyedarka kami pasal penemu. Bala Youth SIB Grace. Bala indai-indai ti udah lelak nyendiaka pemakai kami. Semina Tuhan ulih malas pemanah kita. Aku besampi ngambika gerija ktai majak ngerembai alu mai mayuh gi bansa kitai ngagai pengasih Tuhan...Amin

Gambar

"Ditu meh endur kami puji sembah"

"Pintu penama agai SIB Grace"

"Jalai ke dapur"

"Bilik Sunday School. Endur kami makai/tinduk."

"Dapur"

Nya meh sekeda gambar ke ulih ditangkapku. Minta ampun enti gambar enda terang laban aku ngena kamera telipun. Tambah agi ku ngambar maya malam. Tang amat meh kem tu nang ngubah pengidup kami. Diatu aku berasai semak agi nggau Iya. Ukai Iya ke ninggal ka aku, tang aku ke ninggalka Iya. Diatu ku nemu Tuhan nya amat amat kaih ka kitai. Aku besampi ngagai genap iku kita ti macha tu pan mega deka ngelala iya nggau lebih agi. Amin....

Testimuni Roland G.: Aku Ninga Nyawa Tuhan Ngasuh Betubat

(Tu siku ari kaban ku ari SMK Meradong, Roland Guang. Diatu iya ba pum 5.Baka aku mega iya suba endang urang Kristian tang ba nama aja, Tu testimuni Guang alu bakani iya tau ngelala Tuhan Jesus sechara peribadi. Ngarapka testimuni tu tau nambahka iman kitai alu majak semak sesemak enggau pengasih Iya.Halleluya!!!)

Mimit Pasal Aku

Nama aku Guang, Roland Guang. Aku diau ba Rumah Agas Lubuk Lelabi, Pakan. Kami semadi bisi 4 iku. Aku anak ke-3 ari kami semadi. Aku setat besekula ba SMK Meradong taun 2005. Ba SMK Meradong aku diau ba buding. Ba SMK Meradong, ninting ari sigi bisi sembiang kelab ISCF. Endurya ba lab sekula. Setat ku pum 1 aku kala dibai kami serumah, namaya Shella besembiang lemai ba sekula. Terubah ndar ku tama ISCF, nadai nama nama asaiku, nemu meh kita, agi tau dikumbai anak mit. Nya kebuah enda lama udah nya alu enda datai agi ku. Ka agi ku main nggau bala kaban lipak-lipak ba sebelah sekula sebedauka tama kelas pukul 7 lemai. Bakanya meh pengidupku. Tama ku pum 2 alu setat mantaika 'taring' ba sekula. Pum 3 balat agi deh..

Ngelanggar Atur Sekula

Bisi sekali aku kala digantung sekula laban 'escaped' belajar lemai. Seminggu aku nda sekula laban gantung.Tambah mega ba kelas maya chigu ngajar, suah ndar ngemelika chigu. Apai indai laban. Enggau bala menyadi anang gi deh. Enti kita meda penatai ku ngagai kelap ISCF. Datai nda datai nda aku. Pum tiga mina ujung taun aja aku datai. Nya pan laban bai urang. Enda 'ikhlas' datai. Tang mimit pan aku nda nemu setat tama pum 4, Tuhan udah bisi nyendiaka langkar ti chukup manah dalam pengidupku. Amat munyi ko Jaku Tuhan ba 2 Koint 6:2 Diatu meh maya aku ningaka nuan, Diatu meh maya nuan deka diselamatka!! Nda disedar aku taun nya meh (2008) taun maya aku deka diadaka baru ke dalam perintah Serga.

Chigu Moris

Maya nya Tuhan udah nganjung siku nembiak Iya iyanya Chigu Morris ngagai sekula kami. Iya ex nembiak SMK Meradong nang sigi AJK ISCF ditu suba iya. Diatu iya nydi chigu ba dia.Aku setat bekelala enggau iya alu nyadi rapit tauka rapat serapat nggau iya. Kala kami dikumbai urang anak enggau apai laban ke kelalu rapat.Laban iya nyadi siku ari Chigu pengulu ba ISCF, aku nang suah diansak iya datai belama ninting lemai. Ka pan enda, datai ga... Nda aku nemu maya nya langkar tauka 'plan' Tuhan ke aku baru setat. Ninting taun ISCF bisi nganjurka Kem antara sekula. Taun nya (2008) kem nya digaga ba Gerija SIB Charis Sarikai maya bulan 8. Kem tu sepemanjai 4 ari aja. Chigu Moris majak ngansak aku ngasuh ku enggau. Ujung ujung aku pan enggau.Mimit nda pan aku ngadang maya kem nya meh pengidup ku enda ka sama agi ..

Kem ISCF

Ari keterubah aku nggau kem nadai nama-nama, maya puji sembah ketawa ke urang nyabak. Maya nya bisi diayanka urang cherita "Passion Of Christ". Mayuh urang nyabak tang aku ba belakang dia majak ketawaka urang. Sekali, maya puji sembah sekali gi, tak nda nemu nama kebuah tak bekerenjui ai mata. Tak nyabak kediri aku ba belakang. Tanya kaban ku nama kebuah nyabak, aku pan nda nemu, tak tiba-tiba aku nyabak. Nya terubah iya aku ngasaika ketata tauka urapan tauka 'anointing' Roh Kudus. Tang nya baru keterubahya. Bisi agi besai agi ka diturunka Tuhan ngagai aku.

Bulih Genera (Vision)

Udah ke utai nyadi kemari, ari kedua, aku pan setat ngambi serius nggau kem tu. Saritu kami bepasa (fasting). Tengah ari nya kami bisi ngaga puji sembah baru. Maya kami puji sembah tengahari nya aku berasai lemi selemi tulang. Aku pan enda nemu kebuah. Majak lemi selemi alu ngujungka aku luput maya nya. Maya ku luput nya meh aku bulih genera. Ba generaku nya aku meda diri bejalai surut, ba mua aku bisi siti penampak baka api kelita ti jauh. Aku meda aku bejalai majak jauh sejauh ari penampak nya. Udah nya aku bisi ninga nyawa urang ngasuh aku betubat(repent). Aku enda nemu sapa empu nyawa nya tang ku nemu nya ari Tuhan. Udah ku dani nya aku madah agai bala kaban ku pasal utai peda ku nya. Malamnya kami bisi altar call, nya meh maya sapa urang ke ka betubat ka ngaku dusa tau mansang ke mua agai altar. Alu ba dia bisi Pastor alu besampi ka kami. Mayanya meh aku alu mansang ke mua. Nda berasai ai mata labuh maya aku bejalai ke mua. Mayanya aku amat nesal amat ke dusa ku ngelamatu. Ngelaya urang, ngelaban chigu, ngelaban apai indai... Semua nya aku besampi ngambika Tuhan ngampunka aku. Benung ku disampika urang, sekali gi aku luput baru. Aku begenera baru. Tang diatu aku meda diri ukai bejalai surut tang mang ke mua dalam terang penampak. Aku berasai gaga laban Tuhan udah ngampunka aku. Alu Iya amat sayauka aku. Sekumbang aku ke pulai ari kem nya, idupku enda sebaka agi. Idupku berubah sekijap mata. Aku meh mensia baru, ke lama udah ngelebus ke baru udah datai. Nya alai menyadi dalam Kristus enti kita ka ngelala enggau dalam agi giga meh Iya laban bup Kudus bisi madah dalam Matthew 7:7 "Pinta lalu kita deka diberi; Giga aku kita deka tetemu; Tekung alu pintu deka dibuka ke kitai" Tuhan merekatka semua......

(Diatu Guang nyadi AJK ISCF taun 2009. Ari nda ngelala Tuhan ngagai ngelala Tuhan, Ari pemetang ngagai Penampak. Ari penyai ngagai Pemanah. Ari Pemati ngagai Pengidup ti Meruan. Kita deh? Puji ke nama Tuhan Jesus Kristus belama lama. Amin...)